Y Comisiynydd yn croesawu cyllid i wella’r cymorth sydd ar gael i bobl y mae trais a cham-drin rhywiol wedi effeithio arnynt
Dywedodd Rhian Bowen-Davies, Comisiynydd Pobl Hŷn Cymru:
“Rwy’n croesawu cyhoeddiad Ysgrifennydd y Cabinet dros Gyfiawnder Cymdeithasol, y Trefnydd a’r Prif Chwip, bod Llywodraeth Cymru yn buddsoddi dros £2 filiwn i’w gwneud hi’n haws i bobl y mae trais a cham drin rhywiol wedi effeithio arnynt gael gafael ar gymorth arbenigol a gwasanaethau therapiwtig.
“Bydd y cyllid hwn yn galluogi sefydliadau arbenigol i gynnig cymorth angenrheidiol i filoedd o oroeswyr ledled Cymru. Pobl hŷn, yn bwysig iawn, yw nifer o’r goroeswyr hyn.
“Mae angen i gamau gweithredu ehangach gael eu cymryd, ochr yn ochr â’r cyllid hwn, er mwyn diogelu a chefnogi pobl hŷn sydd mewn perygl o drais a cham-drin rhywiol, neu sydd yn profi hynny. Fel rhan o’m rhaglen waith, rwyf i wrthi’n ceisio llywio’r datblygiadau hyn mewn partneriaeth â chyrff cyhoeddus a sefydliadau allweddol.
“Mae hyn yn cynnwys cymryd camau gweithredu i gael gwell dealltwriaeth o brofiadau bywyd pobl, yn ogystal â gwella’r data oedran sydd ar gael i greu darlun cliriach o ble mae angen rhagor o adnoddau a chymorth.
“Mae hi’n allweddol hefyd bod gan weithwyr proffesiynol ac ymarferwyr yr wybodaeth angenrheidiol i adnabod arwyddion posibl o drais a cham-drin rhywiol er mwyn gallu cysylltu pobl â’r help sydd eu hangen arnynt, a’u cadw yn ddiogel.
“Mae pobl y mae trais a cham-drin rhywiol wedi effeithio arnynt yn gallu bod ymysg y mwyaf agored i niwed yn ein cymdeithas, ond mae’r mater hwn yn parhau i gael ei guddio, ac mae pobl yn ei chael hi’n anodd ei drafod. Dyna pam ei bod hi’n hanfodol bod cymunedau ledled Cymru yn parhau i weithio gyda’i gilydd i wella’r gwasanaethau a’r cymorth sydd ar gael, er mwyn sicrhau bod pobl o bob oed yn ddiogel, ac yn cael eu hamddiffyn a’u cefnogi.”
