Blaenoriaethau’r Comisiynydd

Ers iddi ddechrau’r swydd ddiwedd y llynedd, mae’r Comisiynydd wedi teithio ar hyd a lled Cymru i gwrdd â channoedd o bobl hŷn er mwyn cael clywed o lygad y ffynnon am y materion a’r heriau sy’n effeithio ar eu bywydau, yn ogystal â’r newidiadau a’r gwelliannau yr hoffent eu gweld.

Ar ben hyn, cynhaliodd y Comisiynydd ymgynghoriad ‘Dweud eich Dweud’, a oedd yn gyfle i bobl hŷn o bob rhan o Gymru gysylltu â hi i rannu eu profiadau o heneiddio yn ogystal â’u barn a’u syniadau am beth ddylai’r Comisiynydd eu blaenoriaethu. Roedd yr ymateb i’r ymgynghoriad yn gadarnhaol dros ben – daeth dros 400 o ymatebion i law – a gallwch chi ddysgu rhagor am beth oedd gan bobl hŷn i’w ddweud wrthym yma.

Mae lleisiau pobl hŷn, a’r wybodaeth werthfawr wnaethon nhw ei rhannu, wedi siapio Strategaeth 2025-28 y Comisiynydd yn ogystal â’i Rhaglen Waith ar gyfer 2025-26. Mae’r Strategaeth yn nodi ei hamcanion strategol dros y tair blynedd nesaf, ac mae’r Rhaglen Waith yn nodi’r camau gweithredu penodol y bydd hi’n eu cymryd yn ystod y deuddeg mis nesaf i sicrhau newid cadarnhaol.

Mae Strategaeth a Rhaglen Waith y Comisiynydd yn seiliedig ar bedwar canlyniad cenedlaethol a nodwyd yn ystod y cyfnod ymgynghori. Rhaid i’r canlyniadau hyn gael eu gwireddu os ydym ni am sicrhau bod Cymru yn arwain y ffordd i bobl hŷn:

• Sicrhau bod pobl hŷn yn gallu cael gafael ar yr wybodaeth a’r cyngor sydd eu hangen arnynt
• Sicrhau bod pobl hŷn yn teimlo’n ddiogel yn eu cartrefi, yn eu cymunedau ac yn eu perthnasoedd
• Sicrhau bod pobl hŷn yn cael eu trin yn deg a bod eu cyfraniad yn cael ei gydnabod a’i werthfawrogi
• Sicrhau bod lleisiau pobl hŷn yn cael eu clywed a bod ganddynt ddewis a rheolaeth dros eu bywydau.

Mae’r canlyniadau hyn hefyd yn darparu fframwaith ar gyfer y camau y mae’n rhaid i gyrff cyhoeddus a gwasanaethau yng Nghymru eu cymryd i ymateb i’r amrywiaeth o heriau a rhwystrau sy’n wynebu pobl hŷn, ac i gyflawni’r gwelliannau mae pobl hŷn eu heisiau a’u hangen.